زبانحال حضرت علی(ع)به حضرت زهرا(س)   من کلام:عندلیب

                       ای برج عزتین مه تابانی فاطمه

آغلار گوزین علی اولا قربانی فاطمه

مدتدی بسترینده یاتوبسان یارالیسان

گوزدن سالوبسان عالم امکانی فاطمه

آللهدان ایستورم دوراسان بیر ایاقه سن

باهم گزاخ مدینه طاهانی فاطمه

اما بو یاره لر بولورم الدورر سنی

قاره گونه قویار شه مردانی فاطمه

چوخ یاره لر دگوب منه اما یخیلمادیم

یخدی سنون غمون من نالانی فاطمه

ای خسته دل مریضیم ایاقه دوروب یری

شاد ایله منزل اهلینی بیر آنی فاطمه

سالدی سنی زمانه ایله درده روز و شب

هر نیلدیم تاپولمادی درمانی فاطمه

هی سسلورم سنی ولی گلمور سنون سسون

دیندیر گیلن بو خانه سی ویرانی فاطمه

ای وای منه اجل توزی قوندی جمالیوه

روحون یاخوندی درک ایده جانانی فاطمه

ای کوکب مدینه هله باتما صبر ایله

تار ایلمه گوزومده کی دنیانی فاطمه

هر سوز باشی الوم دیوب اوت سالما جانیمه

وصل عالمونده باشلاما هجرانی فاطمه

یوخدور سوزوم که هر یارانان بیر گونی اُلر

درک ایلیر اجل هامی انسانی فاطمه

اما سنین بو سینیله چوخ تیزدی الماقون

تیز دور خزان اولا بو گلستانی فاطمه

دوت نازنین بالام آناسیز قالسا نیلرم

کیم رام ایدر او جمع پریشانی فاطمه

عالم هامی آتا اولا ویرمز آنا یری

اولماز یقین آتا ، آنا عنوانی فاطمه

هر دم گورورم ایوده قیزیم زینب آغلوری

دردین دیمور یانور ولی پنهانی فاطمه

گاهی گیدور اوزون او یانان درگهه قویور

سوز دلیله باشلوری افغانی فاطمه

ویرّم قولاق گوروم نه دیور نازنین بالام

گورّم دعا ایدور حق سبحانی فاطمه

عرض ایلوری خدا آنامین ویر شفاسینی

ایله آنامون عمرونی طولانی فاطمه

بیر اربعین نصیب ایله بو (عندلیبه)سن

یا کربلانی یا که خراسانی فاطمه 

التماس دعا