مجموعه اشعار امام زمان (عج)

عاقلا فکر ایت   مطّول  خلقت  یزدانیده

خیر و شّرون گور ئوزون آئینه وجدانیده

نعمت  الوان  گوناگون  سنه ایجاد ایدوب

کوه  و  دشت و باغ ،گلزار و گل بستانیده

چشمه سارون جوششی هم سبزارون رویشی

عمده  بیر  نعمتدیلر  انسانه  هر  دورانیده

نیلگون  دریالرون  پهناسینون  معناسی وار

سنله  صحبت  ایلیور  آرامش و طوفانیده

سیری  سرگردان  بلوطلار آسمان پیمادیلار

تا  که  اولسونلار  مر  بارش  بارانیده

بارش باران نزول رحمت رحمانیدور

مادر پیر طبیعت گل آچا دامانیده

غنچه نون دیلسیز اوشاق تک لبلرینده سوز یاتوب

سّر سبحان الّذی وار لالۀ خندانیده

گللرین هر  برگی بیر قرآندی گویا عارفه

یعنی سوز وار هم گولین برگینده هم قرآنیده

گللرین شهدین چکور زنبور عسل تولید ایدور

چکمگه سوز شهدین اما یوخ چیخار انسانیده

بحر علم الله قرآندان بشر آلمور کمک

صرف ایدور  عمر گران قدرین ره خسرانیده

عالما قرآنه باخ غرق اولما غربین علمینه

فکروی پروازیدن  ساخلار قویار زندانیده

غرب ئوزی قرآنیدن الهام آلوب چاتدی بورا

سن  اسیر  اولما  کمند  سلطۀ  شیطانیده

آچ همای فکروی یوروقون قنادین بندیدن

ئوز توانون قدری سیر ایت سیرۀ سبحانیده

شرق و غرب و کُل عالم موریدن کمتر اولار

مختصر اندیشه ایتسون منطق یزدانیده

گوندریوب قانون قرآنه نچه آموزگار

تا بشر واقع  اولا  ارشادیلن غفرانیده

کَج گیدن کس رأفت اسلامیدن بهره آلوب

دامن دینه قیتسون فرصت جبرانیده

قانیلن  قرآنی  احیا  ایلیوبدور  اهل بیت

صدر  اعلایه  چاتوبلار  نشر الرحمانیده

ئوزلرین  طوفان  طغیانه  گرفتار ایلیوب

منجی  انسان اولوبلار  قورخولی طوفانیدن

چون  امامه حال  مرگیلن حیاطین فرقی یوخ

هاردا  شیعه  سسلنوب  حاضردیلر  بیر آنیده

قوتاروب  دنیاده  مأموریتن اون بیر امام

اون ایکمینجی امام عمر ایلیور پنهانیده

سایۀ لطفی همیشه اهل اسلام اوسته دی

سسلروک آدین اورکدن لحظۀ بحرانیده

سامرا شهرینده دنیایه گوز آچدی بو امام

سامرا  نوره  بوروندی  نیمۀ  شعبانیده

سینۀ نرجس اولوبدور شرق روی آفتاب

ویردی  مأوا آفتابه مغرب دامانیده

بو گُل نرجس یارانجاق قصد قتل ایتمیشدیلر

واقع اولموشدی بو زهرانون گُلی عداونیده

تحت ظّل عسگریده گون بگون رشد ایلیوب

چاتدی بش سنّه ولیکن خلقیدن کتمانیده

شربت  شهـد  شهـادتلن  امـام عسگری

ویردی جان سُکنا ایدوبدور جنّت جانانیده

جسمینه اولدی کفن تشییع ایدوب دفن ایتدیلر

اهل  بیتی  یاس  دوتوبلار  خانۀ  خوبانیده

اهل دل درک ایلدی هانسی سوزی فاش ایتمدیم

ایلدیم  زینب  کیمی  پنهان  دل  لرزانیده

گون عزادار اولدی ،آی غمگین ، بلوطلار آغلادی

گورسنوب  آثار  محنت  عالم  امکانیده

نظم عالم  چون  امامیله  منظم  ساخلانور

آخرین  دانه  یر  آلدی  شدۀ  مرجانیده

مصدر حقدن  چاتوب  حکم امامت مهدیه

بش  یاشندا  اگلشوبدور  مسند  سلطانیده

غم دوتان یوزلر گُل آچدی جنتّین گلزاری تک

روح  قرآن  واقع  اولدی  علّم  القرآنیده

آخرین مأمور یزدان حکم آلوب اولدی امام

رکن  خلقت  ساکن  اولدی  اکمل  ارکانیده

قان نجه دائم گرگ پیکرده جریان ایلسون

جسم  عالمده امام اول قاندی که شریانیده

اولماسا  عصرین  امامی ذی حیات اولماز بشر

سایۀ  لطفی  گرگ  اولسون  سَرِ دورانیده

غیبت طغراسی  باشلاندی او گوندن یتمش ایل

طالع اولدی باتدی فوراً گون کیمی بیر آنیده

غیبت کبراسی امّا  محنت  عظما  اولوب

شیعه لر   آغلار  قالوبلار   تهمت  نادانیده

سالِ اوچ یوز یرمی دوقوزدان بو غیبت  باشلانوب

انتظار آثاری  قالمش  دیدۀ  گریانیده

شیعه لر آغلار گوزین تیکمش گجه گوندوز یولا

ساخلیوبلار  یر  گوز  اوسته  هم  دل القانیده

مهدی یا مهدی آدی دیللرده واردور روز و شب

نوحه آهنگینـده  گاهی  ناله  و افغانیده

گاه  قرآن و دعا و ذکر لرده  سسلروک

گه بُکا  و  گه نَوا  و  گاه خوش الحانیده

بلمروک الآن بقیع  یا کربلاده آغلیور

یا گزور شیعـه محالین کشـور ایرانیده

بلمروک محراب مسجدلرده یا هیئت ده دی

باش باشا ویرمیش و یا ایتامیله ویرانیده

نایبان خاص یتمش ئیلده اولدی دورت نفر

بو معّین  شخصلر  اولدی  بو  شهدن  با  خبر

اوّلی سعداوغلی عثمانیدی  نایب حضرته

حضرتین  فرمایشاتین  او  دیردی  امته

دومین  نایب  محمد ابن عثمان ذکریدور

خلق آرا اعمالی  چوخ  با منطق و خوش فکریدور

سومین  نایب که مأموریتی  چوخ  سختیدور

روح نوبخت اوغلیدور آدی حسن ، خوش بختیدور

چارمین  شخصیکه  خاصه نایبیندن دور بیری

ثبت اولوب آدی علی بن محمد سیمیری

انتظارین گلشن  دللرده  هرگز  سولمیوب

آخرین  نایب  یرینده جانشینی اولمیوب

محرمیت  بیزده  یوخ  غایبدی  فخر روزگار

شیعه لر گُوزلَر ، قالوب گوزلر یولوندا انتظار

جان فدا اولسون  بو دینون  شاه عالم گردینه

هامیدان  چوخ  گوزلری آغلار حسینون دردینه

گوزلری  یاشلی دیر جَّدا سنه  دل داغلارام

گوز یاشیم گوزدن  قوتارسا روز و شب قان آغلارام

یاده سالام سعدین اوغلی ویردی فرمان لشگره

کربلاده سو یولی سّد اولدی آل حیدره

یاده سالام  کوفیان  بی ادب کافرسیر

اولدولار که  اوستوه  مور و ملخ  تک حمله ور

معرفت  سر حّد  مرزین  ظلمیلن سندیردیلار

بوسه گاه حیدره نیزیله یاره ویردلار

یاد ایدوب اول وقتوی قلبیم دوشر غم چاهوه

گلدی بی صاحب آتون میدانیدن خرگاهوه

ذوالجناحی گورجگین بیکس لرون آغلاشدیلار

ذوالجناحه ساری اللّر باشدا یکسر قاشدیلار

با زبان  بی زبانی  ایلدی  داد وانین

عترت  پیغمبره  اعلام ایدوب ئولدی حسین

ذوالجناحین آلدیلار  دورین  بنات دیده تر

گوردیلر  قانه  باتوبدور واژگون اولمش اَیَر

ساشلارین رسم  عزائیله  پریشان  ایتدیلر

نا امیدانه  دوتوب یوز عرشه افغان ایتدیلر

جامۀ امید  دلدن  آل عصمت  سویدولار

پاپیاده کربلا  میدانینه  یوز قویدولار

کوفه نون ارذللری  ذاتاً  عجب  ناکسدیلر

ویرمیوب  سو  باشوی ظلمیله عطشان کسدیلر

ئولجک  عباسون جفا و ظلمه فرصت تاپدیلار

سینون اوسته شام و کوفه لشگری آت چاپدیلار

یاده سالام اول زمانون عترتون اولدی اسیر

عصمت اللهین قیزین ارذللر ایتدی دستگیر

بی ادب لر حرمت آل اللهی سندیردیلار

ناز پرور قیزلاری قمچیلریلن ویردیلار

قیزلاری محمللره  میندیردیلر  دلده نوا

کربلا تک آغلادی آل اللهه ارض و سما

دیل دیور ،گوز آغلیور ،اظهار ایدنده غملری

ناقه لر اوسته گون آلتدا یاندی یوزلرده دَرَی

دوشدیلر بیر حاله یوللاردا ، سُوَزن اولدوزلارون

رنگ وسیمادن تانینموردی حیالی قیزلارون

شهریدن شهره بیابانلاردا ویلان اولدولار

شاخه سیندن آیریلان گللّر سولان تک سولدولار 

التماس دعا